Haelder Aod Prinse

De Haelder Aod Prinse (HAP) zeen noeats opgerichtj, waal losgelaote. Det mót örges in de sjtrenge wintjer van 1984 gebäördj zeen. De vastelaovendj in Hael hieët ein hieël aoj gesjiedenis en ein rieke tradisie, mer prinse zeen t’r pas vanaaf 1946. Kènnelik wis men zich toen echt geine waeg mieër mèt die men, en höbbe ze daoróm van erme ozel de HAP mer oetgevónje.

Sjtoeptegels

Sjtök väör sjtök zeen wae doorgewinjterdje vastelaovesveerders in hert en neere. Zelfs noe nog is 90 % van diegene die hiejboeave oppe foto sjtaon, nog zeer aktief betrokke biej de Haelder Vastelaovendj. De HAP is gein óngerdeil van de Haelder vastelaovesvereniging De Gangmaekers, mer in ’t Besjtuur en kemissies van vastelaovesvereiniging ‘De Gangmaekers’, in de prinsekepel, biej de wageboewers; uuëveral zitte Happers tösse, wie wildj graas tösse de sjtoeptegels.

Alik

Nao ein jaor van vaere en klatergoud, maag de ‘prins van ’t väörig jaor‘ óngeraan beginne: mèt drank hoeale väör de rest. ’t Jaor daonao mót ‘r ’t vaandel drage, en väöral zörge det ‘t dink veilig toeskumtj. Det aan hemzelf sjtökke kómme kan de anger Happers gein poes sjille, es ’t vaandel mer alik blieftj. Mócht t’r ‘t daonao nog zeen zitte, den maag hae biej de Hap blieve.

Grenze

Ein paar kieër per jaor höbbe de Haelder Aod Prinse aktiviteite. De väörnaamste zeen: ós optraeje op de prinseresepsie, de Hap-nacht (leedjes en sketches oet de aoj does), de zomervergadering en ’t forellevèsse. Mer ‘t meist memorabele moment in ’t jaor is toch waal de ‘jaorlikse jaorvergadering’. Ederein is den bliej es t’r toet en mèt de twieëdje róndjvraog ueëverlaeftj. Väöl mieë kan ueëver dees biejeinkomst neet gezagdj waere, sónger de grenze van ’t betamelikke mèt henj en veut te traeje.

Leedje

Eder jaor maaktj de HAP ónger de Olympische Gedachte en väöl dorst ouch ein leedje väör ‘t leedjeskonkoer van de Gangmaekers. Wisselendje sjrievers en komponiste höbbe zich dao al aan gezatte, mèt aeve wisselendj sukses. LVK-finales van de Hap woeare d’r in 1998 (Es ’t mörge gister waas), 2005 (De fluitendje hieëring) en 2018 (Mörge weer). Väör ’t LVK 2019 sjtaon de Haelder Aod Prinse in eder geval al in de halve finales mèt ’t leedje ‘Kepotmaekerie’.